News about Trichy

Tamil news from around the world!

மத்திய குழு சென்னை வந்தது புயல் பாதித்த பகுதிகளில் இன்று முதல் 3 நாள் ஆய்வு
சென்னை: கஜா’’ புயலால் பாதிக்கப்பட்ட பகுதிகளை ஆய்வு செய்ய 7 பேர் கொண்ட மத்திய குழுவினர் நேற்று சென்னை வந்தனர். இவர்கள், தலைமை செயலாளருடன் ஆலோசனை நடத்திவிட்டு இன்று முதல் 3 நாள் நேரடியாக பாதிக்கப்பட்ட  இடங்களை ஆய்வு செய்கின்றனர். டெல்டா மாவட்டங்களில் மத்திய, மாநில அமைச்சர்களை மறித்து விவசாயிகள் போராட்டம் நடத்தி வரும் நிலையில், மத்தியக் குழுவினர் தமிழகம் வந்துள்ளது பெரும் எதிர்பார்ப்பை ஏற்படுத்தியுள்ளது. கஜா’’ புயல் தாக்கி நாகப்பட்டினம், தஞ்சாவூர், திருவாரூர், புதுக்கோட்டை, கடலூர், ராமநாதபுரம், திருச்சி, திண்டுக்கல், சிவகங்கை, கரூர் உள்ளிட்ட மாவட்டங்களில் பெரிய அளவில் சேதம் ஏற்பட்டது.குறிப்பாக டெல்டா மாவட்டங்களில் பயிரிடப்பட்டிருந்த தென்னை, வாழை, நெல் உள்ளிட்ட தோட்டக்கலை பயிர்கள் அனைத்தும் சேதம் அடைந்தது. சுமார் 45 லட்சம் தென்னை மரங்கள் சூறைக்காற்றில் வேரோடு முறிந்து விழுந்துள்ளன. புயல் தாக்கி ஒரு வாரம் ஆகியும், இன்னும் சில இடங்களுக்கு நிவாரண உதவியே கிடைக்கவில்லை என்று அப்பகுதி மக்கள் போராட்டம் நடத்தி வருகிறார்கள். புயல் நிவாரணம் மற்றும் மீட்பு பணிகளுக்கு தேவையான நிதியை கேட்டு பெற முதல்வர் எடப்பாடி பழனிசாமி நேற்று முன்தினம் டெல்லி சென்று, பிரதமர் மோடியை சந்தித்து பேசினார். ரூ.15 ஆயிரம் கோடி வழங்க வேண்டும் என்றும், தற்காலிக புனரமைப்புக்காக உடனடியாக 1,500 கோடி வழங்க வேண்டும் என்று கோரிக்கை வைத்தார்.அவர் கோரிக்கையை ஏற்று, மத்திய உள்துறை அதிகாரி டேனியல் ரிச்சர்ட் தலைமையிலான 5 பேர் கொண்ட குழுவினர் நேற்று இரவு 8.15 மணிக்கு சென்னை வந்தனர். இவர்களுடன் தமிழகத்தில் பணியாற்றும் மத்திய அரசு அதிகாரிகள் 2 பேர் ஆய்வில் இணைந்து கொள்கின்றனர். இதுகுறித்து, வருவாய் நிர்வாக ஆணையர் சத்யகோபால் நேற்று நிருபர்களிடம் கூறியதாவது: டேனியல் ரிச்சர்ட் (மத்திய உள்துறை இணை செயலாளர்) தலைமையில் கவுல் (மத்திய நிதித்துறை ஆலோசகர்), வத்சலா (மத்திய வேளாண்மை துறை இயக்குனர்), மானிக் சந்திரா பான்ட் (மத்திய ஊரக வளர்ச்சி துறை துணை செயலாளர்), வந்தனா சிங்ஹால் (மத்திய எரிசக்தி துறை தலைமை பொறியாளர்), ஹர்ஷா (மத்திய நீர்வள ஆதாரத்துறை இயக்குனர்), இளவரசன் (மத்திய போக்குவரத்து துறை கண்காணிப்பு பொறியாளர்) ஆகிய 5 பேர் கொண்ட குழு ேநற்று இரவு 8.15 மணிக்கு சென்னை வந்தனர்.இதைத்தொடர்ந்து, இன்று (சனிக்கிழமை) காலை 10 மணிக்கு சென்னை, தலைமை செயலகத்தில் முதல்வர் எடப்பாடியை மத்திய குழுவினர் சந்தித்துப் பேசுகின்றனர். முன்னதாக 9 மணிக்கு தமிழக தலைமை செயலாளர் கிரிஜா வைத்தியநாதன் மற்றும் வருவாய்த்துறை, நிதித்துறை, வேளாண் துறை உள்ளிட்ட உயர் அதிகாரிகளுடன் ஆலோசனை நடத்துவார்கள். இந்த ஆலோசனையின்போது, மத்திய குழுவுக்கு `கஜா’’ புயல் பாதிப்பு குறித்த வீடியோ காட்சிகள் மற்றும் புகைப்படங்களுடன் விளக்கி கூறப்படும். இந்த கூட்டம் முடிந்ததும் சனிக்கிழமை காலையே சென்னையில் இருந்து விமானம் மூலம் திருச்சி சென்று அங்கிருந்து கார் மூலம் புயல் பாதிக்கப்பட்ட இடங்களுக்கு சில குழுக்களாக பிரிந்து நேரில் சென்று பார்வையிடுவார்கள். அப்போது, புயலால் பாதிக்கப்பட்ட மக்கள், விவசாயிகளை அவர்கள் நேரில் சந்தித்து பேசுவார்கள். தொடர்ந்து 3 நாட்கள் அதாவது 26ம் தேதி வரை பாதிக்கப்பட்ட பகுதிகளில் மத்திய குழு ஆய்வு செய்யும்.இதைத்தொடர்ந்து வருகிற 27ம் தேதி மத்திய குழுவினர் மீண்டும் சென்னை வந்து, தலைமை செயலகத்தில் முதல்வர் எடப்பாடி பழனிச்சாமி மற்றும் மூத்த அமைச்சர்கள், துறை சார்ந்த ஐஏஎஸ் அதிகாரிகளுடன் ஆலோசனை நடத்துவார்கள்.  இவ்வாறு சத்யகோபால் கூறினார்.  இந்தநிலையில், திருவாரூர் மாவட்டம், மன்னார்குடி 33-வது வார்டில் கஜா புயல் காரணமாக சேதமடைந்த மின் கம்பங்கள் கடந்த 8 நாட்களாக சீரமைக்கவில்லை. இதனால், கோபமடைந்த மக்கள் திடீரென மன்னார்குடி தஞ்சை இடையிலான நெடுஞ்சாலையில் சாலை மறியல் போராட்டத்தில் ஈடுபட்டனர். அப்போது மத்திய அமைச்சர் பொன்.ராதாகிருஷ்ணன், தஞ்சையிலிருந்து திருத்துறைப்பூண்டிக்கு காரில் வந்தார். பொதுமக்கள் மறியலால் அமைச்சரின் கார் செல்லமுடியாமல் நின்றது. அமைச்சருடன் வந்தவர்கள் கார் செல்ல வழி கேட்டுள்ளனர். மக்கள் சம்மதிக்கவில்லை. உடனே பொன்.ராதாகிருஷ்ணன் காரிலிருந்து இறங்கி வந்து போராட்டத்தில் ஈடுபட்டவர்களிடம் பிரச்னை குறித்து கேட்டார். அவர்களிடம் பேச்சுவார்த்தை நடத்திய அமைச்சர், டெல்டா பகுதியை பார்வையிடுவதற்காகத்தான் செல்கிறேன் என கூறினார். மேலும், மின் கம்பங்கள் மற்றும் நிவாரண உதவிகளில் பாகுபாடு காட்டுவதாக போராட்டத்தில் ஈடுபட்டவர்கள் குற்றச்சாட்டை முன்வைத்ததால் அதிகாரிகளை அழைத்து நிவாரண பணிகளில் பாகுபாடின்றி பணிகளை மேற்கொள்ள வேண்டும் என்று உத்தரவிடுவதாக உறுதியளித்தார். பின்னர் மறியலில் ஈடுபட்டவர்கள் கலைந்து சென்றனர். இதன்பின், பொன்.ராதாகிருஷ்ணன் திருத்துறைப்பூண்டிக்கு சென்றார்.புதுக்கோட்டை மாவட்டம் கந்தர்வக்கோட்டையில் 8 நாளாக குடிக்க தண்ணீர் இல்லை. மின்சாரம் வரவில்லை. உணவு கிடைக்காமல் மக்கள் இருட்டில் தவித்து வருகின்றனர். இதுவரை எந்த அதிகாரிகளும் வந்து பார்க்கவில்லை. இதை கண்டித்து நேற்று காலை கந்தர்வக்கோட்டை பஸ் நிலையம் முன் பொதுமக்கள் சாலை மறியலில் ஈடுபட்டனர். துணை முதல்வர் ஓ.பன்னீர்செல்வம் கந்தர்வக்கோட்டை பகுதியை பார்வையிட நேற்று அவ்வழியாக காரில் வந்தார். மறியல் நடப்பது தெரிந்ததும், சற்று தூரம் உள்ள வளவம்பட்டி பிரிவு ரோட்டில் காரை நிறுத்திவிட்டு அங்கேயே நின்றுகொண்டிருந்தார். புதுகை எஸ்பி செல்வராஜ் அங்கு சென்று போராட்டத்தை முடிவுக்கு கொண்டு வர பேச்சுவார்த்தை நடத்தினார். துணை முதல்வருக்கு வழிவிடும்படி கேட்டுக்கொண்டார். இதையடுத்து துணை முதல்வர் அங்கு வந்தார். அவரது காரை மக்கள் மறித்து முற்றுகையிட்டனர். வேறுவழியின்றி பன்னீர்செல்வம் காரிலிருந்து இறங்கி வந்து மக்களிடம் பேச்சுவார்த்தை நடத்தினார். அப்போது அவர்கள் ஒருவாரமாக மின்சாரம் இல்லை, குடிக்க நீர் இல்லை என்று சரமாரியாக புகார் கூறினர். இதைக்கேட்ட துணை முதல்வர், இதற்கான பணிகள் நடந்து கொண்டு இருக்கிறது. இதை விரைவுபடுத்தத்தான் நாங்கள் வருகிறோம் என்றார். பின்னர் அங்கிருந்து அவர் புறப்பட்டு சென்றார். இதேபோல் காந்தி சிலை அருகே மற்றொரு தரப்பு மக்களும் ஓபிஎஸ்சை மறித்ததால் பரபரப்பு ஏற்பட்டது. அங்கும் போலீசார் பேச்சுவார்த்தை நடத்தினர். இதையடுத்து துணை முதல்வர் அங்கிருந்து புறப்பட்டு சென்றார். இவ்வாறு மத்திய, மாநில அமைச்சர்களை பொதுமக்கள் முற்றுகையிட்டு போராட்டம் நடத்தி வரும் நிலையில், மத்தியக் குழுவினர் நேற்று சென்னை வந்தனவர். இன்று முதல் பாதிக்கப்பட்ட பகுதிகளை பார்வையிடுகின்றனர். மத்தியக் குழுவினரின் வருகை மக்கள் மத்தியில் பெரிய எதிர்பார்ப்பை ஏற்படுத்தியுள்ளது.
Dinakaran , Nov 23, 2018
புயலால் பாதித்த பகுதிகளை பார்வையிட மத்திய குழு இன்று மாலை வருகை: ஆர்.பி.உதயகுமார் தகவல்
Dinakaran , Nov 23, 2018
திருவாரூர், திருச்சி, நாகையில் கனமழை பெய்து வருகிறது
Dinakaran , Nov 22, 2018
திருச்சி வெடிமருந்து ஆலைக்கு உரிமம் வழங்கியது தொடர்பான ஆவணங்களை தாக்கல் செய்ய உத்தரவு
மதுரை : திருச்சி வெடிமருந்து ஆலைக்கு உரிமம் வழங்கியது தொடர்பான ஆவணங்களை தாக்கல் செய்ய மத்திய வெடிபொருள் கட்டுப்பாட்டு அதிகாரிக்கு உயர்நீதிமன்ற கிளை உத்தரவிட்டுள்ளது. திருச்சி முருகப்பட்டில் செயல்பட்டு வரும் வெடிமருந்து ஆலையில் 2016ல் நடந்த விபத்தில் 19 பேர் பலியானார்கள். இந்த விபத்துக்கு பிறகு வெடிமருந்து தொழிற்சாலை இயங்க தடை விதிக்கப்பட்டது. தடையை எதிர்த்து தொழிற்சாலை நிர்வாகம் நீதிமன்றத்தில் வழக்கு தொடர்ந்தது. ஆலையை இயக்க அனுமதிப்பது தொடர்பாக மக்கள் கருத்தை கேட்க நீதிமன்றம் உத்தரவிட்டிருந்தது. மக்கள் கருத்தை கேட்காமல் வெடிமருந்து ஆலைக்கு மாவட்ட நிர்வாகம் தடையில்லா சான்று அளித்தது.
Dinakaran , Nov 8, 2018
தமிழகத்தில் உள்ள முக்கிய ஆறுகளின் குறுக்கே சிறு அணைகள் கட்ட கோரிய வழக்கு தள்ளுபடி
Dinakaran , Oct 30, 2018
திருச்சி ஸ்ரீரங்கம் கோவில் சிலை திருட்டு புகார் தொடர்பான அறிக்கை தாக்கல்
Dinakaran , Oct 23, 2018
மும்பையில் இருந்து துபாய் செல்ல பயணிகளுக்கு மாற்று ஏற்பாடு செய்யப்பட்டுள்ளது : ஏர் இந்தியா விளக்கம்
Dinakaran , Oct 12, 2018
விபத்து குறித்து விசாரணை நடத்தப்படும், அதன் பிறகே முழுவிவரம் தெரியவரும் : திருச்சி விமான நிலைய அதிகாரிகள்
திருச்சி : திருச்சியில் சுவரை இடித்துக்கொண்டு சென்ற விமானம் மும்பையில் தரையிறக்கப்பட்டது. இந்த விபத்து குறித்து திருச்சி விமான நிலைய நிர்வாக ஆணையர் குணசேகரன் பேட்டி அளித்துள்ளார். அப்போது விபத்துக்குள்ளான விமானத்தில் சென்ற பயணிகளுக்கு மும்பையில் இருந்து துபாய்க்கு செல்ல மாற்று விமானம் ஏற்பாடு செய்யப்பட்டுள்ளது என்று கூறினார். மேலும் மின் விளக்கு கோபுரத்தில் விமானம் மோதியவுடன் விமானியிடம் தகவல் தெரிவிக்கப்பட்டது என்றும் அவர் விமானத்திற்கு எந்த பாதிப்பும் இல்லை என தெரிவித்து தொடர்ந்து விமானத்தை இயக்கினார் என்றும் விமான நிலைய இயக்குனர் கூறினார். மேலும் விபத்து குறித்து முழுமையான விசாரணை நடத்தப்படும், அதன் பிறகே முழுவிவரம் தெரியவரும் என்றும் இயக்குனர் தெரிவித்தார்.
Dinakaran , Oct 11, 2018
சமயபுரம் யானை மசினியின் நிலை குறித்து அறிக்கை தாக்கல் செய்ய தமிழக அரசுக்கு உத்தரவு
Dinakaran , Oct 10, 2018
எந்தவித ஆதாரமில்லாமல் தனி நபர்கள் மீது அவதூறாக செய்திகளை வெளியிடுவது தவறு : டிடிவி தினகரன்
திருச்சி : நக்கீரன் கோபால் கைது செய்யப்பட்டதை தாம் வரவேற்பதாக அம்மா மக்கள் முன்னேற்ற கழகப் பொதுச் செயலாளர் டிடிவி தினகரன் தெரிவித்துள்ளார். இதையடுத்து எந்தவித ஆதாரமில்லாமல் தனி நபர்கள் மீது அவதூறாக செய்திகளை வெளியிடுவது தவறு என்றும் அந்த வகையில் நக்கீரன் கோபால் மீது வழக்கு தொடர்ந்து இருப்பதை நான் வரவேற்கிறேன் என்றும் தினகரன் கூறினார். இதனிடையே பத்திரிக்கையாளர்கள் தங்களது பொறுப்புணர்ந்து செயல்பட வேண்டும் என்று கூறிய அவர்,  கடந்த 1996ம் ஆண்டு என் மீது அவதூறு செய்தி வெளியிட்ட நக்கீரன் கோபாலுக்கு 6 மாதம் சிறைத் தண்டனை பெற்று கொடுத்தேன் என்று கூறினார். முன்னதாக சென்னை விமான நிலையத்தில் நக்கீரன் கோபால் இன்று காலை கைது செய்யப்பட்டிருந்தார். கைது செய்யப்பட்ட நக்கீரன் கோபாலிடம் சிந்தாதிரிபேட்டை காவல் ஆணையர் அலுவலகத்தில் விசாரணை நடைபெற்று வருவது குறிப்பிடத்தக்கது.
Dinakaran , Oct 9, 2018
திருச்சி விமான நிலைய விரிவாக்கத்திற்கு சுற்றுசூழல் நிபுணர் மதிப்பிட்டுக் குழு அனுமதி
திருச்சி :திருச்சி விமான நிலைய விரிவாக்கத்திற்கு சுற்றுசூழல் நிபுணர் மதிப்பிட்டுக் குழு அனுமதி வழங்கி உள்ளது. 37 நிபந்தனைகளுடன் விரிவாக்கப்  பணிகளுக்கு மத்திய சுற்றுசூழல் நிபுணர் குழு அனுமதி வழங்கி உள்ளது. ரூ.951 கோடி செலவில் திருச்சி விமான நிலையத்தை விரிவாக்கம் செய்ய திட்டமிட்டுள்ளது. விமான போக்குவரத்து இயக்குநரகத்திடம் தடையில்லாச் சான்றிதழ் பெற வேண்டும் என்று நிபந்தனை விதிக்கப்பட்டது. இந்திய விமான நிலையங்கள், தமிழ்நாடு மாசு வாரிய அனுமதியையும் பெற வேண்டும் என்றும் நிபந்தனை விதிக்கப்பட்ட நிலையில், விரிவாக்கத்திற்கான நிலம் கையகப்படுத்துவதற்கு விவசாயிகள் எதிர்ப்பு தெரிவித்து வருகின்றனர்.
Dinakaran , Oct 5, 2018
திருச்சியில் திருக்கோயில் பணியாளர்களிடம் தகராறு செய்ததாக பாஜக பிரமுகர் கைது
Dinakaran , Sep 18, 2018